Qırımtatar Milliy Meclisi
Qırımtatar Milliy Meclisi - Qurultayda vekiller arasından saylanğan ve Qurultaylar arasındaki devirlerde Qırımtatar halqını temsil etken yuqarı vekaletli tek organdır. Meclis, öz çalışmaları aqqında Qurultayğa esap bermekte olıp, Qurultay qararları, mezkür nizamname, milletlerarası uquq normaları ve bu normalarğa uyğan Ukraina qanunçılıq qararları esasında iş köre. Meclis nizamnamesi yapılğan deñişiklikler ve ilâveler, Qurultay tarafından tasdıqlana. Meclisniñ bulunğan yeri – Aqmescit şeeri.
Faaliyetlerini teşkilâtlandırmaq içün Meclis:
- er seviyede saylav yolunen meydana ketirilgen Qırımtatarlarnıñ milliy temsil ve idare organları sistemasını teşkil etip, bu organlarnıñ faaliyetlerini idare ete;
- öz yapısında kerekli olğan bölüklerni, işhane, müessese ve vaqıflar teşkil ete;
- devlet ve cemiyet organlarınen, çet el ve milletlerarası teşkilâtlarınen işbirligi yapa;
- öz kütleviy haber organlarını teşkil ete.
Meclisniñ baş yolbaşçısı olğan organ – Qırımtatar Milliy Qurultayıdır.
Qırımtatar Milliy Meclisi:
- Qurultay qararlarını ömürge keçire;
- Qurultay oturımlarını çağırır ve bu oturımlarnı ötkerüv nizamını Qurultaynıñ Çalışma Qaidelerine köre belgile;
- Meclis Prezidiumını, icra organlarını şekillendirile ve bu organlarnıñ çalışma esaslarını tasdıqla;
- Meclis Reisiniñ taqdimi ile Meclis bölükleriniñ ve icra organlarınıñ yolbaşçılarını tayin ete;
- Ukrainada ve Ukraina sıñırlarınıñ tışında bütün seviyelerde Qırımtatar halqını temsil ete;
- Yañı Qurultayğa iştirak etecek vekil saylavlarını teşkil ete;
- Yañı Qurultaynıñ birinci toplaşuvında vekâlet aqlarını teslim ete;
Mecliske 33 kişi saylana. Meclis toplaşuvları, üç ayda bir kereden az olmayacaq şekilde ötkerilip, Meclis azalarınıñ 2/3-den az olmağan qısmınıñ iştirak etmesinen keçerli sayıla. Meclis qararları, toplaşuvğa iştirak etken azalarnıñ mıtlaqa ekseriyet reyi ile alına.
Nevbetten tış Meclis toplaşuvları:
- Meclis Reisiniñ qararınen;
- Meclis azalarınıñ eñ az 1/3 qısmınıñ talabınen;
- Qurultaynıñ Teftiş Komissiyasınıñ talabınen;
çağırıla. Teftiş Komissiyasınıñ azaları, yerli ve regional meclislernıñ ve Qırımtatarlarnıñ Qırımğa qaytuvını qolaylaştırma komitetleriniñ reisleri, Meclis toplaşuvlarına muzakere reyi aqqınen iştirak ete bile. Meclis, öz toplaşuvlarında Teftiş Komissiyası tarafından muzakere etilmesi talap etilgen meselelerni muzakere etip, bu meseleler aqqında qarar almağa mecburdır. Meclis ve Meclis bölükleriniñ faaliyetleri, Meclis toplaşuvları arasındaki devirlerde Meclis Prezidiumı tarafından idare etile.
Meclisniñ qurulışı
deñiştir- Prezidium
- Reis
- Birinci Reis muavini
- Reis muavini
- Malümat-talil merkezi
- İdareler
- İçtimaiy-iqtisadiy ve gumanitar siyaset idaresi
- Yerli ve regional meclis faaliyetlerini koordinatsiya etme idaresi
- Siyasiy ve uquqiy işler idaresi
- Cemaat ve milletlerara teşkilâtlar ve kütleviy haber vastaları ile munasebetler idaresi
- Hızmetler
- Uquq hızmeti
- Protokol hızmeti
- Komissiyalar ve iş gruppaları
- Kâtibiyet
- Vatandaş qabul odası